9-19 шілде аралығында «Тілдарын» облыстық тілдерді оқыту орталығында өтіп жатқан «Jańa álіpbı negizindegi qazaq tili emlesin meńgertý» атты 24 сағаттық қысқа мерзімді курсты ІІ лек тыңдаушылары тәмамдады.
Аталмыш кезеңде Қостанай облысы әкімінің аппараты, Ішкі саясат басқармасы, Полиция департаменті, Мемлекеттік қызмет және сыбайлас жемқорлыққа қарсы іс-қимыл департаменті, Қостанай облысы табиғи ресурстар және табиғат пайдалануды реттеу басқармасы, Қостанай облысы жұмыспен қамтуды үйлестіру және әлеуметтік бағдарламалар басқармасы, Еңбек, әлеуметтік қорғау және көші-қон Комитетінің Қостанай облысы бойынша департаментінің қызметкерлері сабақ барысында жаңа емле бойынша практикалық тапсырмалар, тест тапсырмаларын орындап, диктант жазу, жылдамдыққа оқу дағдыларын қалыптастырды.
Курсты Ш.Шаяхметов атындағы «Тіл-қазына» ұлттық ғылыми-практикалық орталығында «Жаңа емлені оқыту әдістемесі» атты республикалық тренерлер дәріс-курсынан өткен «Тілдарын» орталығының мамандары А.Доспанова мен М.Айтимова жүргізді. Тыңдаушылар курс соңында оқытушыларға өз ризашылықтарын білдірді.