«Тілдарын» облыстық тілдерді оқыту орталығында 05-16 тамыз аралығында «JAŃA ÁLІPBI NEGIZINDEGI QAZAQ TILI EMLESIN MEŃGERTÝ» бойынша 24-сағаттық қысқа мерзімді курстың ІҮ легі болып өтті. Курсты орталық оқытушысы А.Ж.Нұрбекова жүргізді.
Курсқа түрлі мекемеден барлығы 38 тыңдаушы қатысып сертификат иеленді. Олар: облыс әкімінің аппараты, Полиция департаменті, әскери бөлім, ҰҚК, Мемлекеттік қызмет істері және сыбайлас жемқорлыққа қарсы іс-қимыл агенттік департаменті, мәдениет және жұмыспен қамтуды үйлестіру және әлеуметтік бағдарламалар басқармасы, Меңдіқара аудандық тілдерді оқыту орталығы, Статистика департаменті, Ш.Қабылбаев атындағы Қостанай академиясы, политехникалық колледжі, ҚӘТУ, Мемлекеттік әлеуметтік сақтандыру қоры АҚ қызметкерлері, сондай-ақ өз өтініштері бойынша жеке кәсіпкерлер мен зейнеткерлер де қатысты.
Курста емлені үйретуде сөздердің айтылу, жазылу нормаларын қалыптастыруда «Жаңылтпаш айту», «Ұйқасын тап» ойындары, сөздердің жаңа әліпбимен жазылу дағдысын қалыптастыруда «Latynvord» шешу, берілген материалды бекіту мақсатында тест тапсыруда kahoot интернет бағдарламасы тәрізді оқытудың жаңа технологиялары қолданылды.
Сабақ барысында сөздік диктант, терме диктант жазылып, жылдамдыққа оқу технологиясы бойынша 80-100 сөзден тұратын мәтіндер ұсынылды.
Сонымен қатар, тыңдаушылар Qazlatyn.kz сайтында kırıl – latyn, latyn – kırıl қарпі арқылы сөздер мен мәтіндерге конвертация жасауды үйренді.