«SóıleTime» qazaq tili sóılesý klýbynyń tusaýkeseri ótti

2021 jylǵy 19 naýryzda Qostanaı oblysy ákimdiginiń tilderdi damytý basqarmasynyń „Tildaryn“ oblystyq tilderdi oqytý ortalyǵynyń uıymdastyrýymen Y.Altynsarınniń memorıaldyq murajaıynda «SóıleTime» qazaq tili sóılesý klýbynyń tusaýkeseri ótti. Atalmysh is sharaǵa Qostanaı oblysy ákiminiń orynbasary B.Esimova qatysyp, barlyq qatysýshylardy quttyqtady.

Klýbtyń maqsaty – Memleket basshysy atap ótken til úırenýge umtylǵan barlyq otandastardy qoldaý: «Memlekettik tildi biletin árbir azamat óziniń bilimin qazaq tilin úırengisi keletin dostarymen, áriptesterimen, tanystarymen bólissin», memlekettik tilde úırengisi keletin ár azamatqa kómek kórsetý, óz oıyn qazaq tilinde jetkizýge úıretý.

İs shara barysynda qazaq tilin jetik meńgergen ózge ult jastary óz tájirıbelerimen bólisip, tildi ońaı meńgerý boıynsha sheberlik klasstaryn kórsetti. Olardyń ishinde M.Gorkı atyndaǵy mektep-gımnazıasy qazaq tili jáne ádebıet pániniń muǵalimi Dmıtrı Romashenko jáne Tobyl qalasyndaǵy bastaýysh synyp muǵalimi Ekaterına Gedzýr. Sonymen qatar, Qostanaı oblystyq qazaq drama teatrynyń dırektory Álimhan Myrzahan tilderdi úırený eshqashan kesh emes ekenin aıtty.

Klýbtyń kezdesýleri aptasyna 1 ret beıresmı jaǵdaıda ótedi, mysaly, kafede, saıabaqta, tabıǵatta. Kezdesý-otyrystardyń formaty ár túrli bolady – aýyzsha áńgime, art-kesh, shaqyrylǵan qonaqtardyń qatysýy, til bilgirlerimen tanysý, bestsellerlerdi oqý, fılmderdi sýbtıtrlermen qaraý, jańa ónimderdi, qoǵamdyq ómirdegi oqıǵalardy talqylaý.